Toshkentda «InnoWeek» innovasion g‘oyalar haftaligi o‘tkaziladi
Joriy yil 17-21 oktyabr kunlari Toshkent shahrida ilmiy va innovasion faoliyatni rivojlantirish, joriy etish hamda uning natijalariga bag‘ishlangan «InnoWeek» xalqaro innovasion g‘oyalar haftaligi o‘tkaziladi.
«Barqaror rivojlanish uchun yashil innovasiyalar» mavzusida bo‘lib o‘tadigan mazkur haftalik doirasida Xalqaro texnologiyalar ko‘rgazmasi tashkil etiladi.
Unda muqobil energetika tizimlari, biotexnologiyalar, kimyo sanoati, robototexnika, atrof-muhit muhofazasi, materialshunoslik yo‘nalishlari bo‘yicha ilmiy-tadqiqot namunalari va tijoratlashtirishga tayyor ishlanmalar namoyish etiladi.
«InnoWeek» - innovasion g‘oyalar haftaligida dunyoning 50 dan ortiq davlati va xalqaro tashkilotlar, 100 dan ortiq kompaniyalar, 40 ga yaqin xorijiy tashkilotlarning ishtirok etishi kutilmoqda.
Tadbirda qatnashishni xohlaydigan innovasion g‘oya egalari, tadbirkor va investorlar www.InnoWeek.uz sayti orqali onlayn ro‘yxatdan o‘tishi va batafsil ma'lumot olishi mumkin.
